Мэта акцыі – нагадаць, як важна падкормліваць птушак у зімовыя дзянькі. У гэты час яны затрачваюць больш энергіі, кааб сагрэцца, і ежы ім трэба таксама больш. «Дазораўцы» загадзя развесілі кармушкі, падрыхтавалі ласункі для птушак.
Чым частаваць птушак?
Найлепшы корм для вераб’іных – несалёныя і нясмажаныя сланечнікавыя семкі. Чысціць іх не трэба. Можна зрабіць сумесь, дадаўшы да гэтых семак неапрацаванае проса і авёс.
Для сінічак і дзятлаў – свежае сала (толькі несалёнае!) – яны паласуюцца з задавальненнем. Кавалачкі сала можна нанізаць на цвічкі па краях кармушкі, прывязаць да галінкі або падвесіць у сетачцы.
Вераб’і, зелянушкі, попаўзні і чыжы не адмовяцца ад арахісу (зноўжа – несалёнага і нясмажанага!)
Чым разнастайнейшым будзе пачастунак, тым больш відаў птушак можа наведацца да “застолля”.
Ад кожнага з нас залежыць, каб як мага больш птушак не засталіся галоднымі ў халады. Няхай да вашай кармушкі прыляціць як мага больш крылатых гасцей!
Ж.А. Валетка,
кіраўнік клуба «Крылаты дазор»